VALENTINE'S DAY-----Muhabbat ka din, ya be-raah ravi ka toofan???

             Haqiqat kharafat mein kho gayi ,

           ye ummat riwayat mein kho gayi

        Dunya bhar k tehwar jo media ki aankh hamein dikha rahi hai, wo na sirf hum dekhte hain balke tamam tar ehsasat k sath is mein shamil b hojate hain.Alamya aur dukh is baat ka hai k goron se azadi k bawajood hamara matmah-e-nazar abhi tak unhi par hai, hum fitri aur zehni ghulami se azad na hosake.

        Aj se taqreeban dus saal qabl Pakistani muashre k khad-o-khaal pe ghor kiya jaye to valentine's day ki kharafat kahin nazar nahi aatien lekin budqismati se un dus saalon k andar be-hayai ka jo toofan hamare muashre mein umad aaya  hai, us k talne k asaar nahi milte.

"Hum mashriq k matwalon ka dil maghrib mein ja atka hai"

Maghrib ki in be-ja riwayat ko hum apnate to bohot shoq se hain par apne zaati ehsasat ko opposite gender par expose karne k liye kabhi kisi ne ye nahi socha hoga k is din ka origin kya hai...ek maayub se maqsad k liye valentine naami ek shakhs ne gher-shadi shuda couples ko milane ka qadam uthaya,jisko is gunah k liye phansi ki saza di gayi,usi valentine ki yaad mein ye din har saal manaya ja raha hai.maghribyat is qadar hum par taari horahi hai k hum apne tahaffuzati dairon se chhut-te jarahe hain.Barhti hui be-raah ravi aur modernism k naam par maghrib ki andhi taqleed hamari apni mazhabi iqdaar ka gala ghont rahi hai.Sawaal ye hai k maghrib mein kon hai jo hamare eid manane k saath eid manata hai ya hamari tarah ramzan ki riwayat ikhtiyar karta hai? Kon hai jo baqr eid par hamare saath jaanwar zibah karne ko tayar hojata hai??? Koi nahi.Lekin ek hum hain k jo dekha,sahi ho ya ghalat seekh liya.

       Valentine's day ka tasawur he hamare Muslim muashre mein bara be-bakana hai, be-hayai k tamam raaston ka bulawa hai.Pakistan k mukhtalif areas mein tafreeh gaahon par no-jawan larke aur larkiyon ka hujoom, tamam qaid-o-band se azad, hotels mein be-hijabana aur gher-ikhlaqi taur par milne milane ki azadi hamein europe k muashre se milati hai.

       Iqbal bajaa farma gaye....

Hamari tehzeeb apne khanjar se ap he khudkushi kare gi

jo shakh-e-nazuk pe aashyana banega, na payedaar hoga

Ab hamare muashre or tehzeeb ki dor hum youngsters k hath mein hai.jab hum he valentine's day ki sham ko saal ki masroof tareen shaam bana denge to hamari apni koi identity he na rahegi. Hum ne aj se taqreeban 65 saal pehle ye mulk Islam k naam par manga tha. Us waqt haya, parda or taqwa hamari identity thi but ab ye identity be-hayai k malbe taley dab kar reh gayi hai.Isey ujagar karna ab b hamare hath mein hai...